Aallaqqaasiut

Saqqummersitami matumani 2024-mi suliffissarsiortunut ikiorsiissutinik aamma pisortanit ikiorsiissutinik pisartut sammineqarput.

 

2024-mi januaarip aallaqqaataani inatsisit nutaat marluk suliffissarsiortunut ikiorsiissutinut aamma pisortanit ikiorsiissutinut tunngasut atuutilerput. Suliffissarsiortunut ikiorsiissut siornatigut suliffeqannginnermi ikiorsiissummut taarsiissutaavoq, pisortaniilli ikiorsiissut ingerlatiinnarneqarpoq, inatsimmili tunngaviusumi allannguuteqarluni.

 

2024-mi ikiorsiissutinut nutaanut ikaarsaarneq unammillernartoqarpoq, tassani allaffissornikkut aaqqissuusinermi inatsit tunngavigalungu ingerlatsiviit suli tamakkiisumik naammassineqarsimanngimmata. Tamanna kommunit inatsit malillugu allaffissornerannut pisortallu ataatsimut aningaasarsiaanni aningaasaqarnikkullu aaqqissuussineranni ikiorsiissutinik nalunaarusiornernut ajornakusoortitsivoq. Taassuma saniatigut Akileraartarnermut Aqutsisoqarfimmut ikiorsiissutit suunerinik eqqortumik nalunaarusiornermi aamma unamminartoqarpoq. Ataatsinut isigalungu ukioq manna kisitsisit paasissutissat pisarnermit annertunerusumik nalorninaateqarnerannik isumaqarpoq, taamatullu allaffissornermi ingerlatsiviup nutaap GetOrganized-ip naammassineqarnissaanut saqqummersitassani tulliuttuni sukumiinerusumik kisitsisitigut paasissutissiorsinnaaneq naatsorsuutigineqarsimangaluartoq piviusunngortinneqarani.

 

Ukiumi kisitsiviusumi 2024-mi Naatsorsueqqissaartarfimmit ukiuni tulleriinni naluanaarsuutinik nutaanik aallartitsivoq, kisitsisini paasissutissiani pisortanit ikiorsiissutinik pisartut aamma suliffissarsiortunut ikiorsiissutinik pisartut ataatsimoortinneqarlutik. Siornatigut saqqummersinneqartarsimasuni isertitanut taarsiissutaasunik isumaginninnermi ikiorsiissutinut tunngasuni ernereernermi ullormusianik pisartut ilaapput. Siunissami ernereernerni ullormusiat pillugit kisitsisitigut paasissutissat ernereernermi sulinngiffeqarnermut saqqummersitami saqqummiunneqartalissapput, saqqummersitarlu aamma ernereernermi aningaasaateqarfimmit Amaat-nit ernereernermi sulinngiffeqarlutik aningaasalersorneqartut paasissutissaannik imaqassaaq.

 

Suliffissarsiortunut ikiorsiissut aamma pisortanit ikiorsiissutit

Suliffissarsiortunut ikiorsiissut suliffeqaratik suliffissarsiortunut, sulisinnaasunut, suliffimmillu naliginnaasumik minnerpaamik sapaatip akunneranut akunnerit 20-t suliffeqarnermi atugassarititaasut naliginnaasut tunngavigalungit sulisinnaasutut naliliiffigineqarsimasunut tunniunneqartarpoq. Ikiorsiissut akileraarusigassaavoq.

 

Pisortanit ikiorsiissutit, inunnut allatut imminnut pilersorsinnaanngitsunut taamaattumillu suliffissarsiortunut ikiorsiissummik pisinnaatitaanngitsunut, aningaasaqarnikkut ajutuuinnissami ikiuutissatut atorneqarpoq.

 

Pisortanit ikiorsiissut aki aalajangersimasoq malillugu ikiorsiissummut aamma pisariaqartitsineq malillugu ikiorsiissummut avinneqarsimavoq.

Aki aalajangersimasoq malillugu ikiorsiissut akileraarusigassaavoq, akimik aalajangersimasunik tassungalu tapimik imaqartoq. Pisariaqartitsineq malillugu ikiorsiissut akileraarutaasussaanngilaq pilertortumilli pisariaqartitsinermi kiisalu immikkut ittumik pisoqartillugu ikiorsiissutaalluni.